＂手工菜＂杏仁瓦片

2012/10

杏仁瓦片

成日想幫襯Jenny Bakery 買嚟試下，但永遠都無貨！激氣不如自己整！！

做法簡單但要有心機同耐性，對於性急嘅我嚟講，做＂杏仁瓦片＂係一個好好嘅練習...

材料：

1. 高筋麵粉 30g

2. 低筋麵粉 50g

3. 砂糖 200g
4. 蛋白 220g
5. 牛油 150g （熱融備用）
6. 杏仁片 400g

先將材料 1-3 過篩，分數次加入蛋白，輕力攪拌均勻至無粒粒糊狀，分數次加入已融化嘅牛油，輕力攪拌均勻至麵糊變得有光澤，呢個時候就可以逐少逐少加入杏仁片，每次加入都要輕力攪拌令每片杏仁片都沾到麵糊，但唔好攪太耐以免麵糊起筋！

攪拌勻後就用保鮮紙包住、放入雪櫃雪半個鐘〜

半個鐘之後就可以成盤麵糊拎出嚟，用湯匙𢳂少少麵糊倒喺放咗牛油紙嘅烤盤上面，再用叉將杏仁片撥開，杏仁片要盡量避免重疊！重疊咗焗出咯嘅製成品就會唔靚同埋無咁脆㗎啦！（就係呢個步驟，鋪杏仁片鋪到我頸都痛埋！）

同埋每次取麵糊嘅量盡量差唔多，我覺得之後包裝會方便啲！

如果覺得麵糊太痴好難鋪，叉（或手）可以濕少少水先再鋪，咁會易攪啲！

鋪好咗就噴少少水喺啲杏仁片麵糊上面（我整濕啲手指，用手抹咋），跟住放入已預熱嘅焗爐，180度焗大約20分鐘。

未用完嘅麵糊再放返入雪櫃，唔好留喺室溫！仲有，記得要睇火！因為呢個食譜糖份高，溫度一夠就好快變焦〜

如果想包裝時靚啲，可以喺出爐後略為待涼但尚熱嘅情況下將瓦片放喺擀麵棍令瓦片有輕微曲線，咁樣如果用透明包裝袋包裝嘅話都唔錯！