檸檬薏仁西瓜飲

檸檬薏仁西瓜飲

夏日炎炎，冰箱裡多了一款水果常駐，那就是西瓜了！

除了紅紅的果肉能消暑之外，西瓜皮都能派上用途！

從小媽媽就會為我們幾兄妹把

冰凍了的西瓜起肉並切成適合一口一顆的大小，

剩下的西瓜皮有時會變成＂冰墊＂，敷到臉上消暑；

有時它又會變成＂面膜＂，給生了痘痘的臉美容一下；

更多時候是媽媽會拿西瓜皮去煲煮，變成清涼茶。

長大了，有時也會照媽媽的方式去照顧身邊的人。

今天我買了西瓜回家，下午和老公跑完步

回家我就準備了西瓜粒粒給大家消暑，

同時也善用了剩下的西瓜皮。

媽媽們都相信，這個茶飲可以

消暑、去濕、清熱和保健，我相信還可以美白呢！

材料：

水

西瓜皮

薏仁

糖冬瓜／紅糖／冬瓜蜜

檸檬

做法：

1. 薏仁洗淨、浸水備用。

2. 西瓜皮切小塊、洗淨，與薏仁同放入滾水大火煮開，轉小火煮半小時至一小時，

3. 撈起西瓜皮（可用作製造有機廚餘肥料）

並放入糖冬瓜／紅糖／冬瓜蜜

4. 若放糖冬瓜就再煮15分鐘，其他則略煮至糖溶合即可

5. 待茶飲放涼後放進容器並放進冰箱冷藏

6. 飲用前放數片檸檬片即可

從前是會把檸檬跟糖冬瓜同放並略煮，但為了更有效吸收維生素C同時也避免了連皮煮過的檸檬使茶飲有苦澀味，所以我都愛把新鮮檸檬在飲用前才加進去。

薏仁容易煮焦，要不時攪拌一下喔！

酥皮肝醬焗牛柳

酥皮肝醬焗牛柳

之前同朋友仔學識咗呢味見得人但又易整嘅菜式，即使無乜煮食經驗嘅都可能勝任！

朋友聚會煮呢個都好正啫！準備工作只係用好少時間～ 之後放咗入焗爐就可以做其他嘢～ 

下次長老佢地嚟屋企作客，就整呢個比佢地試下先～～

材料：

牛柳 300g

肝醬 （鵝肝醬／豬肝醬／什肝醬） 1小罐 ／ 1包

酥皮 半包 （可以用自製嘅！）

蛋 半隻

油 適量

鹽 小許

胡椒粉 小許

白蘭地 3茶匙

Day 1

1．即用冷藏酥皮提早一晚由 “冷凍室” （冰格）放入 “冷藏室” （雪格）解凍。

Day 2

2．首先醃牛柳，將白蘭地、鹽同胡椒粉抹勻喺牛柳上面，醃幾個鐘；如果係夏天，醃嘅時候3．可以放入雪櫃，兩個鐘後拎到室溫中再醃多一個鐘。

4．用油將牛柳肉汁煎封，煎1～2分鐘至四面都略呈金黃色就可以從鑊中拎起放埋一邊 cool down 待用；

5．將酥皮輾薄成正方形，四邊要薄啲～ 酥皮準備好就放喺鍚紙上面，跟住放上已變暖嘅牛柳喺酥皮上面、再鋪上肝醬蓋住牛柳；

（如果唔怕綠色食物，事前可以用1湯匙番荽同肝醬混合，咁樣煮出嚟會靚啲、好味啲～[其實味道無乜被改變的]）

6．沿酥皮邊掃上蛋汁，以對角方式用酥皮包起牛柳（如下圖）

7．落少少油喺鍚紙上面，將鍚紙連酥皮牛柳移去一個 “蒸架” 上面，再將成個蒸架放喺焗盤之上，咁樣放係為咗到焗嘅時候有對流嘅熱空氣去到酥皮牛柳嘅底部，令佢受熱均勻。

8．放入已預熱200度嘅焗爐焗20分鐘至約為7成熟 （25分鐘就約莫係8成熟）

9．出爐後再掃上蛋汁、等一等就食得！

如果出爐嘅時候覺得酥皮有啲地方燶咗少少，可以用刀刮咗去～
如果唔係即食，就用160度嘅焗爐焗10分鐘翻熱先食～



（註：
我好鐘意食酥皮，但係，知道其實係好油、好肥、有反式脂肪.... 所以，都係少吃為妙...
同埋，雖然鵝肝好味，但係的確唔係好人道，而且又唔係必須要食嘅嘢，所以.... 偶一為之好了～ 可以睇下有無咩替代品啦...~ ）

澳式甜點 ﹣ Pavlova

澳式甜點 ﹣ Pavlova 

這個 Pavlova 說是澳式甜點也許有人會反對，因為這個以俄羅斯芭蕾舞家 Anna Pavlova （有名的演出：The Dying Swan) 命名的甜點一直被澳洲和紐西蘭爭議到底誰才是原創者，但資料顯示，這個在澳洲和紐西蘭都家傳戶曉的甜點應該是後者原創的吧！詳細可以參考以下：

http://en.wikipedia.org/wiki/Pavlova_(food)

http://www.inmamaskitchen.com/FOOD_IS_ART/reference/Pavlova.html

那為什麽我一開始就說是 “澳式甜點” 呢？ 因為我是從老公的澳籍老闆（M）認識它的。在那很久很久之後我才知道它的故事。


M 邀請我們及其他同事到她家作客，其實是到她家的會所BBQ～ 這是我第一次真正體會外國人的BBQ 方式 ﹣ 用大型的爐具、由一位人拿著食物夾在爐前主理大量食物、大型的燒魚（很美味！）大家分著吃等等，主人家還做了一個色彩豐富的甜點招呼我們，這款甜點也是我第一次吃！
M 很親切，雖然才第二次見面但完全不會感到見外，又不會太熱情令人感到窘迫；跟 M 聊天期間，也談到了這個甜點，得知這個是很地道的、在澳洲家庭裡常見的甜點，差不多家家戶戶都會做、聚會裡常見的；也大概確認了製作時會使用的原材料。

老公知道我對這個甜點的製作有概念，而且他對這個甜點是蠻有好感的，所以在那次聚會之後他偶爾也會叫我試做一下，但我遲遲都未有動身；今天既然到超市買雞蛋準備做蛋糕，就順便也來做一下 Pavlova 吧！


材料：
蛋白 4隻 （冷凍的）
鹽 少量
細砂糖 160g 
（原食譜為200g, 但太甜了，所以減少了，但仍有減甜的空間；
一般食譜都是一隻蛋白約配以 30～50g 的砂糖不等，我想下次用最少的好了！ ）
白酒醋 2茶匙
鷹粟粉 （即玉米粉）2茶匙
雲呢拿籽／香油（隨意）

淡忌兼（即鮮奶油）
糖霜（隨意）
鮮果（莓類或帶酸味的水果，如：藍莓、草莓、桑果、奇異果、燈籠果等等都是不錯的選擇；另外傳統好像必備百香果吧！）

1．先將蛋白及蛋黃（蛋黃可以留來做麵包、蛋糕）分開，將蛋白放到乾淨容器內用電動打蛋器慢速略為打到起泡，放一小撮鹽然後用中高速繼續打發，期間將細砂糖分次放進蛋白並打至企身。

2．蛋白霜打至企身後，加入白酒醋，鷹粟粉及雲呢拿籽再打一下

3．將焗盤鋪一層防沾布／焗爐紙
4．將打好的蛋白霜放入唧花袋，用花型唧咀先唧一層圓型的平台，再在平台旁邊或上方唧上兩圈花塔令整個蛋白霜造型成碗型

5．180度預熱烤，將碗型蛋白霜放入烤爐並即時調低溫度至100度，焗90﹣120分鐘。
6．時間到了就把烤爐門打開一條縫散熱，稍後把門關上並將已焗好的蛋白餅留在烤爐內15分鐘甚至隔夜冷郤。

上餐／進食前：
7．打發淡忌兼，（這次我沒有下糖霜因為整個成品會太甜，所以只用淡忌兼希望中和口味。）並將淡忌兼放到蛋白餅中間
8．放上已洗淨及抹乾的鮮果
完成！

註：
1． 要避免器具及蛋白本身沾有油、水及或蛋黃，這樣會影響蛋白打發成果
2． 加入白醋／檸檬汁／他他粉（cream of tartar）有助蛋白定型
3．如果準備好後不是即日食用／裝飾前發現蛋白餅腍了, 可以將它放入已預熱120度 但熄了火的焗爐,  讓它在裡面待30分鐘，然後放涼才作裝飾及食用。
4．已裝餅的 Pavlova 應該盡快食用，否則應放冰箱以減慢受潮。


後話：
我把多出的蛋白霜唧成了 “蛋白餅肚臍花” 當零咀，不浪費又好吃～ 

白灼墨魚（烏賊／花枝）

＂白灼墨魚＂係其中一樣老公幾鐘意食嘅嘢；第一次自己整嘅時候覺得好核突，就算嫌戴住手套做嘢麻煩，都會照戴先可以掂隻墨魚。好在仲記得細個企喺廚房睇媽咪準備餸菜時處理墨魚嘅步驟，所以即使生手但都好快解決咗佢〜

依家已經唔駛再戴住手套先敢掂隻嘢嚕〜

海鮮嘢好多人都鐘意食，身邊有朋友鐘意食但由於少入廚房開伙，所以都係喺街外先食呢啲＂麻煩嘢＂；麻煩嘅原因係因為如果買返屋企的話會唔知點處理，但事實上一啲都唔難！仲要只要材料新鮮，處理完之後就咁蒸煮／白灼配上合適嘅醬汁都已經可以好好味！

喺屋企食仲要抵好多〜〜〜〜〜

買墨魚嘅時候，魚檔多數都會幫你起咗中間嚿＂骨＂同埋個墨囊，如果你隻墨魚係煲湯用嘅，就事先同檔主講要返嚿骨啦〜 加埋落去煲湯，會香濃啲㗎！仲埋有營養啲！

至於墨囊啦喎〜 其實如果你想煮墨汁意粉，咪同檔主講要埋囉〜 否則，就當下欄比咗檔主啦〜

拎住去咗骨同墨囊嘅墨魚返屋企，首先同佢沖涼，洗洗個身先啦！

根住就可以同佢去＂衣＂。

層衣就好似係佢嘅皮膚咁，係有保護作用嘅〜 你會見到啲墨魚有時會唔同色，其實係佢仲係活生生嘅時候，當受到刺激（襲擊）佢皮膚中嘅細小墨囊就會有反應，例如釋放一啲墨，令全身變咗色跟住就可以匿藏喺海底嘅碎砂石以避開敵人〜 而噴墨就係較進取嘅逃生方法。

講返去衣，其實當檔主切開佢去囊、去骨嘅時候，就已經令到墨魚肉（白色）同佢嘅衣（灰色、墨色）＂披＂咗口〜 你順住條邊去撕就可以去到衣〜 

唔去得唔得？得〜 會唔靚同咬唔開囉〜

我將成隻墨魚分開咗上半部 - 身同翼；下半部 - 咀同腳

個身去咗衣就會好似咁：

除咗衣，佢個身仲會有塊透明硬硬地嘅嘢（圖右上）〜 都係唔要嘅〜

啲衣去哂你就可以好容易咁將身同翼分開，變成咁：

（唔小心連翼都切埋片先記得影相〜

翼有兩片，個身我又會分成四片；呢到係一部份）

跟住到搞佢啲手手腳腳〜 

手手腳腳都有衣㗎〜 去埋佢〜 

啲腳嘅會合點（即係上半身同下半身之間）會有個洞，用手指／較細嘅嘢通通佢，你會發現有兩片＂膠片＂咁樣嘅嘢，聽聞係＂眼＂，我諗係假角膜，呢兩片仔嘢又係唔要嘅〜 

就係喺呢到：

黑色嘅呢〜 見唔見到？

去哂啲唔要嘅嘢，跟住切片；我多數厚切跟住照好似魷魚咁𠝹花〜 有時會薄切，想薄切切得靚仔，切之前墨魚最好浸一浸冰水先啦〜 同埋把刀一定要夠利〜〜

老公今日就咁想食白灼，所以我水滾就放切好咗嘅墨魚片，水再滾就可以撈起跟住等食〜〜 （滾水到我會放兩、三片薑，驅寒去濕）

可以點 - Wasabi + 豉油／泰式辣醋（食生虾嗰啲呢〜）／蒜蓉 + 米醋／辣椒豉油 等等〜 都好好味㗎！

有時想香口啲〜 就撈起之後落啲豉油再攢熟油〜 得咗〜

或者拎嚟炒餸〜〜〜〜 諗起都想食呀！

^u^

黑豉油雙蛋飯（太陽蛋）

 黑豉油雙蛋飯（太陽蛋）曾經係老公幾經常主動要我煮比佢食嘅＂快餐＂，我自己對街外嘅腸蛋飯呀〜 腿蛋飯呀〜 一向無乜興趣，因為兩個字＂唔抵＂！

一條腸、兩隻蛋收廿幾、甚至卅幾蚊！？！！有超過50%我係比梗租金...！

咁想食，不如自己整啦！

自小係食媽咪煎嘅脆邊蛋大，無脆邊？點係煎蛋呀？！所以我整比老公嘅應該叫做... 黑豉油脆邊太陽雙蛋飯！

記住，要係黑豉油，係＂黑豉油＂唔係甜豉油！黑豉油又香又咸咸地但唔太咸，咁樣撈飯先正㗎嘛！淨係黑豉油都要食一碗飯啦！仲要加埋太陽蛋嘅蛋黃汁？！寫寫下都想流口水！

整呢個快餐嘅工具同材料好簡單：

黑鐵鑊

醬油碟

蛋

白飯

油

生抽

老抽

鹽

胡椒粉（古月粉）

就係咁多！都話係快餐㗎啦〜 雖然快，但其實係＂心機菜＂嚟㗎！

夜咗返屋企煮唔到兩餸一湯唔緊要，食呢個嘅時候個心都會好暖立立㗎！

首先熱咗隻黑鐵鑊、加油，油要多少少差不多要兩至三、四湯匙嘅油，大火至油熱了就將預先打咗落碗嘅蛋倒入鑊中心；點解要將蛋先打落個碗到，唔直接落鑊？must sure 落到鑊蛋黃係比蛋白包圍住吖嘛！咁樣嘅太陽先最最靚㗎！你有信心鑊邊咁熱唔會整醜樣你隻蛋，咪直接打囉〜

落咗蛋千祈唔好郁佢！呢個時候我會落鹽同胡椒粉（古月粉），預先調味嘅蛋會好咪過上枱先落調味料！

跟手即刻𢳂定熱飯喺個碟到！呢個時候蛋蛋就開始起泡啦！唔好心急！等多陣！！

鐘意食鬆脆脆邊就唔好搞佢〜

鐘意含蓄啲、實在啲嘅脆邊，就用鑊鏟將啲泡泡督爆佢〜〜 

有泡泡之後可以用鑊鏟推推蛋邊，成粒蛋識移位，即係可以準備反蛋。

因為蛋黃喺中心，四邊受熱均勻，所以都仲係個底熟熟地個面生而又有啲生蛋白cover 住〜

見到條邊煎到金黃色就可反蛋啦！

反蛋時間約莫係4〜5秒，5秒後輕力鏟反轉佢，一來咁樣就唔會過時，二來方便上碟之餘仲可以檢查埋半熟蛋黃係咪比一層薄嘅蛋白膜＂保護＂住〜 

跟手可以鏟起放熱飯面！

記住蛋白膜要薄！因為咁樣即係裡面嘅蛋黃唔會熟哂搞到一陣無蛋黃汁撈飯！

同埋記住唔好手多多成日搵個鑊鏟撩佢〜 

個鑊鏟淨係做幾個動作㗎咋！

起泡推一下做測試、反蛋、再反蛋同起碟，就係咁多，搞得太多蛋黃爆咗唔靚之餘又唔好食...

得一隻蛋梗係唔夠啦〜

依家睇睇隻鑊唔夠油，夠油就落第二隻蛋，唔夠就加多少少，做法跟上面，但反蛋時間可以縮短為3〜4秒，因為個鑊煎完第一隻蛋已經好夠熱！

如果想食三蛋飯，建議煎完第二隻蛋一定要洗鑊先再重複步驟！如果唔係蛋白會變成＂蛋黑＂！見到都唔開胃啦...

其間偷時間倒豉油落豉油碟，我鐘意咸香啲，所以比例係3/5 生抽 2/5 老抽 （鐘意有街外Feel 嘅話，就加埋小小雞粉同糖喺豉油碟到～）稍稍撩均佢〜 

煎完哂蛋，個鑊應該仲有啲油，轉中小火落豉油（落之前要再撩撩佢），兩、三、四秒就關火、𢳂起豉油淋上剛煎好嘅蛋同熱飯面〜 食得！！！

點解落豉油要轉細啲火同幾秒就起？因為豉油（同糖）好易燶，但過一過油同熱鑊咁先有香氣〜 所以成個過程要快〜

點解溝豉油？因為生抽咸香，老抽鮮甜，加埋就無敵〜當然用頭抽都得！！

但蒸魚豉油就...

點解放入豉油碟先？因為兩種豉油唔同密度、唔同成分又唔同比例，我想佢合為一體，如果分開落鑊就溶唔埋一齊，仲可能會燶〜

Chateau Le Puy 2007

上個月去台灣，去到高雄免稅店見到枝 Chateau Le Puy 2007, 如果大家有睇 "神之水滴" 電視版就知道呢枝就係傳說中的神水啦。香港的酒鋪我暫時都未見到有得賣，所以二話不說，俾$$。

http://www.chateau-le-puy.com/

跟據酒莊資料，酒莊採用自然農法耕種 , 不依靠現代化的設備 , 只用傳統的釀酒方法和用超過五十年的陳年木桶，釀酒過程中亦不會加入人工酵母及糖 ，讓其天然地發酵。

色澤是寶石紅色，有些混濁，香味有車尼子、黑加侖子、蘑菇。入口順滑，口感細膩，After taste 短。

開瓶後 1 小時最為精彩個第 2 小時已經開始走下坡了，不知道是否處理得唔好，沒有想象中那麼好飲，同埋唔知關唔關年份事，07 年右岸唔知係唔係好年又或者太年輕，下次有機會見到時，一定要再會一會呢枝神之水滴。

雙重朱古力包

2013/7/2

雙重朱古力包

做給媽媽的牛油餐包很吸引我，所以照辦煮碗多做了一個帶回公司與同事們分享，同事們食後感是讚賞的！並要求要一個朱古力版本。當然沒有問題！回家立即做一個，明天大家又有下午小點了！

材料：
高筋粉 180g
低筋粉 50g
鮮奶 105ml
糖 60g
牛油 42g
雞蛋 45g

朱古力粉 2茶匙
即用酵母 4g

蛋汁 少量（塗面用）

朱古力粒 隨意


用P 仔 105T 打麵團，取出麵團後放到灑了高粉的大碗內

蓋上擰乾濕布再讓它發酵約一個小時，至麵團變兩倍大

拿出麵團切割成8等份滾圓，按扁並放入朱古力粒再滾圓並蓋上擰乾濕布休息30分鐘

時間到了就把麵團移到焗盤內再次蓋上擰乾濕布發酵一個小時

放入已預熱焗爐 160度焗20分鐘。

希望同事們會喜歡這濃濃的雙重朱古力風味。