La Fleur

28/2/2014

長老7號嘅太太自從有 B 之後都無食過生蠔，與其喺屋企由其中一、兩位朋友忙忙碌碌供不應求開比大家，不如出街開開心心飲吓酒嘆住食〜 

今晚我地嚟咗呢間大約有三十個位供應嘅法國餐廳。

上次食過之後，其中一樣印象深刻嘅係佢啲餐前小法包相信應該係自家製，仲幾好味添！

但由於我太鐘意食麵包嘞，去兩次兩次都係唔記得影麵包相就已經將佢地食咗落肚... 下次我一定要記得影先得！！

唔知係咪我有錯覺，我覺得呢到連揸麵包嘅牛油都好味啲！

下次再食真啲先！！

話明係長老夫人想食蠔，咁就梗係嚟返兩大盤生蠔先啦！

唔好以為瘦／無肉，其實好鮮甜味美呢！

蜆唔錯，但無乜特別咁囉〜

呢個沙律我覺得特別呀！！〜

啲菜係我未見過嘅〜 （可能係我見識少？）

好似係叫＂冰菜＂，清甜爽脆〜 加埋新鮮無花果淡淡嘅甜味，好清新呀！

不過對於食慣濃味嘅人嚟講，就可能會覺得無乜味道囉〜 

掛住食，我唔記得咗呢碟嘢個名添！＞_＜ 

質感係介乎肝醬同午餐肉咁〜 但整體無咁膩同濃味，搽麵包同淨食都啱呀〜

煙野生鰻魚配沙律

上次喺＂雪＂食過鰻魚苗食品後對鰻魚苗有非常好而且深刻嘅印象。

呢到嘅鰻魚沙律所用嘅鰻魚味道同鰻魚苗好相似！應該係以類似手法處理過〜

不過呢到用嘅係大概有我前臂咁長嘅鰻魚，唔係BB~

鰻魚有肥美嘅油香、有油香但又清新噃！仲無任何中式煮法時所擔心嘅泥味呢！ 我鐘意〜〜

席間行開咗講電話，返到嚟朋友各長老問我要咩湯，話老公幫我叫咗洋蔥湯，啱唔啱飲〜

蘑菇湯同洋蔥湯之間，老公果然知我心意〜〜〜 ^_^

我諗朋友們可能會諗老公有機會＂估錯＂呢！但如果呢題佢到估錯，就抵打囉！！

講返個湯先！！

嘩！！好多芝士呀！！湯濃郁甜美（洋蔥嘅甜味），但偏好洋蔥嘅我覺得可以再多啲洋蔥〜 同埋浸喺湯中嘅麵包應該係用返餐前法包，但同個湯唔太夾同埋感覺太快過淋，不過整體仍然ok~~

平時喺餐廳老公會飲白湯系列〜 而我就係飲紅湯系列嘅〜

但今日老公飽，所以佢無叫到湯

呢到嘅 ＂法式什菌湯＂ 都有飲過，屬於喺屋企煮到嘅水平。

黑毛豬

無記錯嘅話呢個好似係 off-menu 嘅店員推介！？

好味喎！！粉嫩嘅肉肉又香〜 

什菌香草意大利麵

已經太飽... 飽到食唔出味道啦...

可能飽啦〜 感覺有輕微過油。

大蝦蒜片茄汁意大利麵

蕃茄又係我另一大愛嘅食物〜 呢個味道相較上一個意粉濃，飽都食到味〜

蝦好爽口！意粉係我鐘意嘅扁意粉，加分！

不過整體都係略油。

呢個牛扒個樣唔錯！

不過我唔食牛嘅〜 而且已經食到咁飽！所以大家除咗個＂飽＂字都已經無其他comment 嚕！

3/13

慶祝奶奶生日，再度光顧〜

今次終於記得影餐前法包〜〜 

同場加影海鮮拼盤（2款）：

呢間餐廳係值得encore 再encore！

但前題係，記得早啲訂位！！

Black and White

琴晚去朋友屋企晚飯，雖然係好熟嘅朋友，帶＂兩梳蕉＂上去食飯絕對唔係問題，但既然佢地有小朋友，帶飯後甜品出現一定有人支持！

咁啱我去咗君匯港探朋友+佢三個月大嘅BB，老公又返大角咀娘家附近剪髮，所以我地就順理成章喺呢頭選購我地今晚嘅飯後甜品嘞〜

雖然近年中式糖水、港式甜品回歸甚至日式／台式嘅冰品都大行其道，不過，賣相精緻、色彩吸引仲要有朱古力加持嘅西餅類都幾吸引到我地今次嘅注意！

大角咀近年多咗好多新食力，店舖由以前十年如一日，到早前嘅半年一小轉、一年一大轉嘅又開張又關門大吉浪潮，到今日開始有部份小店做出名堂、企穩陣腳，甚至乎出現分店！

雖然老公娘家喺呢頭，但始終唔係住呢到，而且外面仍然有太多選擇，所以我地仍然未試均呢頭啲餐廳。

今次我地就選咗 "black & white" 呢間我地未試過，而聽聞有不少好評嘅甜品舖。

呢到主要係做西式切餅（蛋糕）／杯裝甜品，起初兩公婆掛住睇近門口位置嘅甜品櫃：

雖然呢到個名叫＂black & white＂，但甜品選擇絕對唔係＂非黑即白＂而係十分colorful。

當差不多選定要乜、諗住向cashier 落order 嘅時候先發現，原來裡面個以切餅為主嘅甜品櫃都好吸引！仲有老公鐘意嘅＂拿破侖＂添！

心大心細又選一輪，最後因為老公怕有人會食咗佢心儀嘅＂拿破侖＂所以我地兩款拿破侖要哂！另外仲要咗opera, exotic （異國風情）（黃色）, 青蘋果慕絲 & 海鹽焦糖慕絲脆脆（白色）。

當食完飯、甜品都未拎到出嚟嘅時候，小朋友已經話要食朱古力味嘅〜 Opera 啱哂！女主人要咗清新嘅青蘋果慕絲，而拿破侖果然係有市場！男友人同老公一人一件，唔洗爭〜

分配得非常好！！喜愛＂焦糖＂嘅我，唔洗選、唔洗爭就食到心儀嘅甜品。

整體嚟講，呢間嘢嘅甜點價格算中上（$4x 一件小小嘅蛋糕），不過選擇多、成品新鮮、賣相討好、最重要味道有層次唔會淨係得個甜字，我諗下次朋友聚會而我地又喺附近嘅話，應該會再幫襯〜 

愉快嘅一日，就以黑白甜點劃上完美句號。

抹茶卷蛋 - ＂宏＂

呢間餐廳賣嘅係日式洋食，嚟到嘅時候人唔多，大約有半滿。門口有專人向心大心細嘅顧客介紹餐點，同時提供試食。

夜晚竟然都仍然可以點＂午餐＂，午餐價格由一年前嘅$90 變成 $99，以午餐嚟講算貴少少，但係喺晚市時食就覺得抵食了！

$99蚊免加一又坐得舒適，喺佐敦地區真係算唔錯！

午餐包括咩呢？

有前菜沙律+

拉麵／海藻烏冬／飯食+

蘋果紅茶／芒果紅茶+

卷蛋糕

因為我好鐘意抺茶，而且唔愛甜食嘅我，當甜食用上抺茶，就會覺得中和咗個甜膩感，大愛。

今日再嚟＂宏＂，主要都係因為佢個卷蛋〜 嘻嘻！所以，餐點嘅甜品我當然係選咗抺茶口味嘅卷蛋啦〜

其實今晚有啲趕時間，但知道＂宏＂嘅服務好明快，所以雖然只有少於45分鐘嘅晚飯時間，我都選擇咗嚟呢到！

其實餐牌有好多選擇，但海藻麵唔係到到有〜 所以我都係同上次一樣，點咗拉麵餐。點餐後大約五分鐘左右就會送上主食。

沙律係用和風沙律汁調味，正常。

味噌拉麵所用嘅海藻麵同一般拉麵質感唔同，類似拉麵混合魔芋嘅質感；海藻麵上嘅兩塊叉燒做得比上次進步了！雖然薄薄兩片，有肉香同時有油香但完全不油膩，好味！

蘋果茶係用茶包沖製，有好香蘋果味〜 如果唔趕時間，飲完杯茶店員會為你再沖泡比你慢慢嘆〜 

食完主食店員先會送上甜點。整個用餐時間嘅長短快慢可以由客人自己拿捏，我旁邊就有一枱女士係慢嚐甜點嘅〜

店內有兩組甜點櫃，當中卷蛋就已經佔滿一櫃，相信卷蛋算係主打〜

件裝卷蛋有兩個size，跟餐嘅係細卷，對我嚟講已經非常滿足！蛋糕軟熟、有蛋香，中間嘅cream 唔算好細密但滑而不膩，成件抺茶卷蛋有淡淡抺茶香味，不會苦澀、甜度又適中。係我杯茶。

餐廳晚上11：00先打烊，本來打算上完堂返屋企之前買一條原條卷蛋返去同屋企人分享，點知可能上堂攰得濟，走嘅時候見到巴士就即刻追住架巴士走... 

〜_〜

唯有下次啦！