阿里山櫻花蜜電鍋蛋糕

2013/1/24
阿里山櫻花蜜電鍋蛋糕 （註：電鍋 ＝ 電飯煲）

一直都唔捨得用由阿里山帶返嚟香港的櫻花蜜，既然今日決定咗做一個清香嘅蛋糕，咁就好好利用一下有特別香氣嘅櫻花蜜啦！

材料：
麵糊：
蛋黃6個，砂糖30g, 櫻花蜜 50g， 菜油 20g, 牛奶 25g, 低筋粉 130g

蛋白霜：
蛋白6個，檸檬汁／白醋 1茶匙 （5cc)，砂糖 50g

先將所有材料秤好～ 低粉過篩～

將雞蛋 （必須要係凍嘅～） 分開蛋白同蛋黃並分別放喺兩個乾淨 （無水、無油）嘅盤內，

蛋白一定唔可以有蛋黃，如果唔係陣間會打唔起～ 

搽一層牛油喺電飯煲內鍋到備用～

做法：
1．將蛋黃＋砂糖用（手動）打蛋器拌勻，跟住加入櫻花蜜並用打蛋器發打至略為泛白就可以加入菜油伴勻

2．將篩好嘅低粉同牛奶分2次交錯加入，混成無粉粒麵糊 （期間要輕力但又要快喎！以免麵糊起筋），麵糊備用。

3．蛋白先用（電動）打蛋器打起少少啲泡，然後加檸檬汁／白醋 （放心！呢個份量嘅檸檬汁／白醋 都唔會影响個蛋嘅味道！）同埋2次加砂糖發打直至蛋白企身，成為蛋白霜備用。

4．舀 1/3 蛋白霜加到麵糊到輕力、快速拌勻，伴勻後可以將其他剩低嘅蛋白霜都加哂入去～

5．將呢盤混合物倒入已搽牛油嘅電飯煲內膽到～ 整靚個麵糊表面跟住 “鄧” 出一啲大嘅氣泡後就可以放返入電飯煲外鍋到，㩒埋 “煮飯” 制跟住就可以等食啦！

我屋企個電飯煲要㩒3次 “煮飯” 先可以將個蛋糕煮熟，點先知道熟唔熟？ 插支竹枝仔入去個蛋糕到，拎返支竹枝出嚟睇下有無濕嘅麵糊痴住～ 有嘅就係未熟，無嘅話就可以出爐啦！

將內膽取出，倒轉放喺架上面，等一陣個蛋糕就會滑離個內膽去咗個架到～ 由於個蛋糕好軟熟㗎！所以唔好由得佢放喺個架到放涼，因為，蛋糕嘅重量有機會令到佢喺個架上 “分屍”...
所以我放涼少少就會將佢轉去個碟到等切。

因為呢個蛋糕係用電飯煲整出嚟，水份保存得好好！所以好軟滑、唔會乾爭爭～
但亦因為佢係用電飯煲整出嚟，所以時間一到就要即刻喺電飯煲到拎出嚟，如果唔係焗喺個煲到佢可能會有倒汗水整濕佢㗎～

呢個蛋糕真係好正！食過嘅人都讚！不單止因為口感好！櫻花蜜嘅獨特香味絕對係吸引人嘅地方之一！

就係呢款蛋糕，令我枝櫻花蜜依家得返半枝咋！ >_<!


（註：我試過同樣做法，轉用其他蜜糖／ 轉用焗爐唔用電飯煲做出成品，出到嚟都好味，不過，我同屋企人都係鐘意用呢個食譜做出嚟嘅效果多好多～）


伸廷閱讀：
http://tw.myblog.yahoo.com/carol-jay/article?mid=257254&prev=258977&next=256875&l=f&fid=39