22/6/2013 (星期六）
泡菜研習班

同老公嘅中學同學們基本上每個月都會聚一聚，當月有人生日嘅就係生日飯聚，無人生日都好我地都會約埋四出吃吃喝喝吹水聊天。

其實講咗整泡菜都講咗幾個月，上個月生日飯期間（五月之星係我呀〜〜〜）又再提起，於是我地就約咗今日一齊整泡菜。原本只係我地兩對李氏夫婦嘅約會，既然六月未有飯聚，而其他人今晚又得閒，所以就順理成章變成大圍嘅聚會。

泡菜營養價值高：（以下轉自維基百科）
1. 泡菜中有豐富的活性乳酸菌，它可抑制腸道中腐敗菌的生長，減弱腐敗菌在腸道的產毒作用，并有幫助消化、防止便秘、防止細胞老化、降低膽固醇、抗腫瘤等作用；
2. 泡菜中的辣椒，蒜，姜，蔥等刺激性作料可起到殺菌，促進消化酶分泌的作用；
3. 泡菜還可以促進人體對鐵元素的吸收。

我好鐘意食泡菜，淥公仔麵會落啲，煮飯有時會整豆腐豬肉泡菜窩，食飯覺得無乜胃口（有幾何無胃口？！藉口！！！）都會拎啲泡菜出嚟加餸。泡菜就食得多〜 但其實整係第一次！今晚咁多人跟我＂搵食＂，事前梗係要做定啲準備功夫！
其實食過泡菜再加上對煮食有概念嘅，應該都諗到要點做，但為免蝦碌及浪費食物，事前我上網搵過啲資料，最後決定將幾個食譜+-*/綜合成自己想要嘅口味，（但因為唔知朋友會唔會鐘意我鐘意嘅口味再加上整整下唔夠醃料，所以最後我做咗兩個版本，一個係重口味版，一個係健怡版）點做？去片！

器具：
果汁機
大盤
玻璃器皿

材料：
大白菜（又名黃芽白、旺菜）一大隻／兩小隻
白蘿蔔一隻
紅蘿蔔一隻
鹽
水

醃料：
1）富士蘋果兩個
2）豐水梨兩個
3）洋蔥一個
4）蒜頭三球
5）薑200g
6）大蔥一條
7）辣椒幾條
8）韓國辣椒醬6湯匙
9）魚露6湯匙
10）蝦醬1湯匙

先將白蘿蔔、紅蘿蔔去頭尾去皮切粒、大白菜從根部打十字切開，
將三樣嘢洗淨、浸鹽水約三小時；為確保食材整體浸泡喺鹽水到同埋脫水情況理想，浸嘅時候可以搵啲嘢壓喺面〜
因為我鐘意蘿蔔爽脆啲，所以佢地浸嘅時間比大白菜短，而大白菜浸至脫水呈軟身狀態即可。浸夠就拎啲材料出嚟沖沖水、放喺筲箕琼乾水備用
(有啲人會浸過夜，我諗係為咗慳時間；但浸太耐我怕脫水太勁會影響成品口感喔！）

將所有器具洗淨、燙大滾水、待乾備用。

跟住到準備醃料。
將富士蘋果同豐水梨去皮去蒂去芯並略浸淡鹽水（防氧化變銹色）備用；洋蔥、蒜頭、薑去皮
以上醃料切成合適嘅大小，跟住就可以放入攪拌機打成汁啦！（當然所有材料事先要洗淨啦！呢樣唔洗講卦？btw, 我仲有用放涼咗嘅熟水過多次㗎！）

將汁料倒出放入大盤；大蔥一條斜切成大圈圈〜 辣椒切粒粒／你鐘意嘅型態，放哂兩樣嘢入汁料、攪拌一下，再加入醃料8-10又攪拌下然後就可以放入食材。因為我想食嘅時候方便啲，所以我唔係成棵旺菜咁醃而係將佢切成段放入醃料。
攪勻之後我就分放入玻璃嘅存氣食物盒到，過兩、三日就已經食得㗎啦！想入味啲？咪放多幾日囉〜
記得要每日打開密實盒比佢放放氣同時攪拌下啲泡菜等佢醃味均勻啲〜 網上一般指最長存放兩星期，其實只要取食嘅時候用乾淨嘅工具，再加上我做嘅泡菜、所用嘅器具都有用滾水／熟水沖過！所以存放期絕對唔止兩星期！
同埋只要你唔介意放得耐泡菜會有酸味〜 （有酸味唔代表佢變壞呀。。。）

講返個聚會，因為另一位李太晏晝要去做產檢，所以我預先做咗洗、切、浸嘅準備功夫，跟住就預備今晚海鮮餐嘅餸〜
轉轉折折大肚婆夫婦最後七點幾先嚟到！所以唯有唔整泡菜住〜 開咗飯先！
今晚海鮮餐餐單：
蒜茸粉𢇃蒸象拔拔
清蒸奄仔蟹
油鹽水煮蜆
白灼花螺
豉油王油爆灼墨魚
除此之外，迎合今晚主題仲整多個豆腐泡菜黑豚肉鍋！炒多個冷飯，大家飽哂〜〜〜
飲飽食醉吹吹水、飲吓功夫茶，咁又過咗一個愉快嘅晚上〜 

因為已經好夜，朋友今次無時間參與製作；而我喺朋友離開之後，約略整理一下屋企、洗淨啲碗再做泡菜已經係零晨時份，用果汁機嘅時候真係好驚嘈醒老公同鄰居！好彩事後老公話我知原來佢根本聽唔到有攪拌機聲！

下次我唔會再零晨時份整泡菜㗎啦！因為我自己都好眼瞓！！！
（健怡版係因為做做下醃料唔夠、又怕再開攪伴機會嘈到人、自己又眼瞓，所以第二日就用餘下嘅材料做咗個健怡版～）


後話：
今次做泡菜嘅材料其實都係冬天先當造，我支持＂不時不食＂呢個理念，所以嚟梗再做應該會用其他食材；旺菜、蘿蔔？留返冬天啦！



參考網站：
http://blog.yahoo.com/_RJDGWFCON5R4XQLGSG2TWKREY4/articles/1201390
http://cutebodi.pixnet.net/blog/post/27448600-【食譜-diy│親手做做%E2%80%A7超級好吃的韓國泡菜
http://tw.myblog.yahoo.com/carol-jay/article?mid=36512