今日老公同我去咗一間位於西環嘅餐廳晚飯，雖然我公司同餐廳嘅距離係近過老公公司去餐廳，但諗都無諗過佢要用兩個鐘頭嘅時間先嚟到！
老公訂咗7：30，其實我都只係準時到達 ， 反正佢未到，所以我入餐廳之前都影咗一張餐廳門口嘅相～ 其實如果我唔係算幾熟西環的話，呢到都算唔易搵！因為餐廳位置喺一條辟靜嘅小街。
雖然餐廳唔係好大，但係由於餐廳員工不多 （應該總共有四個左右？ 一個侍應，三個負責廚房＋海鮮吧＋收銀，我相信其中兩個係老闆），所以我推開門之後要稍等一等先有人由海鮮吧走出嚟招侍我。餐廳唔算人手不足，喺門口稍等座位安排亦無問題，不過有趣嘅係，開門後侍者們望一望我但並無示意我稍等就再次各自繼續進行手頭上嘅工作，呢個反應（仲要咁一致）有啲得意～！？
我被安排咗坐喺門口旁邊嘅一張枱，坐低之後大約過咗15分鐘左右先有人比餐牌我；其實嚟呢到之前已經上網了解過，呢間餐廳嘅服務無乜好評。
其實呢到嘅服務唔係話唔好㗎！啲侍應又唔係話唔肯做㗎喎！但就係唔知點解無乜人理你咁囉～ 可能係想比客人覺得自由啲啩？ 但係呢～ 其實可以放低咗餐牌同比杯水我先再比埋啲自由我囉... （水係到就快埋單佢先倒比我地...)
當日嘅餐牌好簡單，兩版睇哂～
第一版係：頭盤有兩、三款選擇，湯有一款，海鮮拼盤分別係大、細之分，其中一個有海膽，但當日海膽未有供應；第二版主要係主食。
雖然老公未到，不過因為我地心目中想試嘅海鮮拼盤預備時間需要45分鐘，所以我等多幾個字之後，就落 order 啦～ 好肚餓呀！！同埋食生冷嘢前我都鐘意有啲熱嘢暖下個胃先，所以我除咗預先叫定個生蠔之外，就叫咗個 “洋蔥湯” 。
前後等咗就快一個鐘？老公終於出現啦！仲驚佢會盪失路添！老公到咗、加咗少少其他嘢食，就同我一齊坐喺到等食啦～ 等呀等～ 等呀等～ 我真係好肚餓呢～所以等個海鮮拼盤出現嘅時候，其實我好興奮！>u<
頭先咪提過嘅？！ 其中一個海鮮拼盤有海膽，但當日海膽未有供應，負責海鮮吧嘅人問我地換啲生蠔比我地好唔好？
生蠔？！？！ 好！梗係好啦！I like 生蠔！～
當時我完完全全傻瓜瓜地將成句嘅第一重點放0係“生蠔” 兩個字， 第二重點放(錯)咗去個 “啲” 字到，所以，當上菜嘅時候發現原來 “換啲生蠔” 係指 “兩隻” （每人一隻），自己忍唔住喺心裡面笑咗自己... ^^;;
講咗咁耐，終於可以講嘢食啦！！！
大嘅海鮮拼盤有啲咩呢？！ 有：生蠔、蝦、青口、翡翠螺、大蜆、睡蟹、同埋今日無貨嘅海膽～ 好肚餓呀！開餐啦！
嗯～～ 啲蠔好新鮮喎！ 我鐘意海水味嘅蠔，雖然依家唔係 “BER” 字尾嘅月份，但啲蠔都唔瘦喎！一向對太大隻要分幾啖食／好有蠔味好creamy 嘅蠔無乜興趣，咁啱佢今日提供嘅完全無我唔鐘意嘅種類，所以我食得十分之津津有味～～
我地叫咗杯HOUSE WINE （白酒），配上蠔算係咁上下啦～ 唔係話好出色，但都唔差啦～
食完蠔我地就向啲蝦呀～ 蜆呀～ 青口同螺進發～ 由於我好 “汁怪”，所以隨盤附有嘅一點點海鮮醬係完全唔夠用！唔知個汁係咪自製呢？ 個味同平時食開嘅有啲唔同～ 淡一啲同埋係簡單啲嘅味道，不過作為汁怪嘅我，都係要點下汁先盡興嘅～ （平時喺屋企食海鮮，我都會自己調一個啱心水、啱心情嘅汁，所以，我好鐘意喺外面試唔同種類嘅汁，咁返到屋企就可以自己玩下 Max & Match ～）
其實我係麻麻地青口（尤其係青色青口）嘅～好在佢呢到嘅青口都OK～ 值得一提嘅係，我覺得呢到嘅翡翠螺同平時喺外面食到嘅／買到嘅有啲唔同，外表、肉質同味道都有啲唔同；首先講下外表先，平時啲翡翠螺嘅殼會有啲明顯嘅綠色，呢到嘅螺殼主要係灰白色，啲肉質爽得嚟較實淨，味道好似甜啲～ 一句講哂，我鐘意呢到嘅翡翠螺多過平時買返屋企開P 嗰啲～ :P
因為阿妹同家姐都鐘意食翡翠螺，睇下啦～ 或者等阿妹暑假返香港，睇下會唔會帶佢地嚟試下！
終於到隻蟹啦～ 嘩～ 大過個塊面呀！仲要有好多膏！成隻充滿咗膏！唔好以為有膏就無肉食！佢唔會喎～ 仲好好肉地添～ 啲肉唔係松葉蟹爪嗰啲質感～ 我鐘意～
其實食完個併盤都已經飽咗8成 （老公可能已經飽到爆咗炸），我仲要飲洋蔥湯添！所以我地後尾點嘅雞軟骨，雞翼同埋薯條基本上都無乜食過！
其實頭先用餐期間老公要CON. CALL 所以反正都已經食飽，我地坐多咗一陣就決定走嚕～ 但係，嗰幾樣嘢都無乜食到，咁不如就包起佢拎走啦～
好多時我都會有帶食物盒同環保袋嘅～ 但今日同老公出街拍拖食飯，我梗係輕裝上陣啦～ 所以呢一刻唯有麻煩侍應幫我將食物PACK 一下～ 我諗，呢到平時一定係好少有人會打包食物拎走～ 因為侍應聽到我想包起啲嘢食拎走嘅時候，好似輕輕有少少不知所措咁～
侍應將食物拎咗入廚房，過咗一陣，三包用錫紙包住嘅食物就包好再放返喺枱面（係！係就咁三包食物返喺枱面 ），嗯... 但係，我連環保袋都無帶，又無理由將啲嘢食就咁放入手袋㗎... 所以，我又再次向侍應要求佢比個袋我袋住三包食物，呢個時候我諗大家就真係不知所措啦！包括我！因為原來佢地無袋～ 任何物料嘅袋都無～ 嗯... 咁呢... 無計啦～ 就咁拎住囉～ （其實如果我地唔係住得遠呢～ 就咁拎住係絕對無問題㗎～）就喺我諗住就咁拎住三包嘢就埋單走人嘅時候，負責海鮮吧嘅哥哥就拎咗個少少濕嘅紅色背心袋出嚟！當然佢有幫我抺一抺先再拎比我放食物啦～ 其實我都欣賞佢真係有心幫我搵袋㗎！只係我覺得有少少奇怪點解佢地好似喺外帶食物嘅安排咁生手啫？
就係咁，味美嘅一餐之後我又大咗一歲啦！！
有下文！！
返到屋企，沖完涼、關燈準備瞓嘅時候老公特然要我開返燈，好眼瞓喎！做乜仲唔瞓呀？？原來老公買咗生日禮物比我！！
係我勁鐘意嘅鏤空款手錶！ （我之前嗰隻錶帶咗幾年、早排壞咗）
唔怪得早兩星期老公問我係咪要買錶啦！！ 仲去完睇但無買就走人！ 當時我都只係睇啲好普通嘅款～ 無特別睇鏤空款㗎！ 所以當我收到呢份老公靜雞雞去買嘅生日禮物時，真係勁開心！ 又勁鐘意呀！！
多謝老公～
沒有留言:
張貼留言